PHULLEN VENGTHAR KOHHRAN - KOHHRAN PUITLINGA HLANKAI A NIH DAN

Phullen Vengthar (Hmunthar) Kohhran hi Kohhran puitling a nih hma chuan Hmunthar tih a ni thin a. Kum 1973 ah mi tlem te ten Hmun thar an kai atanga kum thum hnuah Beginar Department nei tannin Kohhran chu a lo intan a. Hetih lai hian mimal inah leh sikulahte an inkhawm kual vel thin a ni.

Kum 1976-ah Puitling lam Sunday Sikul neih leh a ni a, kum 1980 atangin Junior Department thleng neih a ni leh ta bawk a. Kohhran Committee chuan Sunday School mumal deuh zawka neih chu thain a hria a, Phunglaia hmun tlangah thingtuai In-in Sunday School Hall sak a ni ta a.

Kum 1980 khan Kohhran Committee chuan Vengthar lamah hian Sunday School mai ni lovin, Pathianni chawhma leh zana inkhawm hrante pawh thain a hria a. Pathian mite rilruah, Biak In thar sak duhnate pawh a lo awm ta zel a. Biak In hmun tur chu Phunglaia hmun tlang (AO tlang) ah tihfel a ni ta nghe nghe a.

Phullen Kohhran Committee chuan Hmunthar Vengah Preaching Station siam turin Presbytery-ah a thlen a. Kum 1981 a Phuaibuanga Presbytery inkhawmpui thu angin, March ni 7, 1982 Pathianni zan inkhawmah Hmunthar Veng chu Preaching Station a ni tih puan a ni ta a ni.

Hun a lo kal zel a, Hmunthar Kohhran chu Kohhran puitlinga hlankai a tha tawh lawm ni tih chu Phullen Kohhran Committee chuan ni 17.2. 1983- ah a ngaihtuah hnuah Presbytery-ah thlen nise a ti a. Presbytery remtihna angin ni 6.11.1983 Pathianni chuan Kohhran puitlinga hlan hun tur chu a ruat ta a. Kohhran puitlinga hlan a nih dawn takah chuan Kohhran hming tur hi ni 16.10.1983-ah uluk taka ngaihtuah a ni a, Hmunthar Kohhran tia sawi thin chu Phullen Vengthar Kohhran tih a ni ta a.

Kohhran Committee-in a lo ruat angin, ni November ni 13, 1983 Pathianni chuan Phullen Vengthar Kohhran chu Kohhran Puitlingah hlan kai a lo ni ta a ni. Kohhran Puitlinga hlankai a nih ni hian Kohhran pui lam (Phullen Kohhran) lamah pawh, chawhma inkhawm leh chawhnu inkhawm chu awm lovin, Phullen Vengthar Kohhranah a hohova inkhawm vek a ni a. Kohhran puitlinga hlanna neitu hi Pastor C.M. Zalenthanga a ni.

Tichuan, Phullen Vengthar Kohhran chu Kohhran puitling a lo ni ta a. Pathian hruaina leh awmpuina changing, Kohhran nung leh ngelnghet tak a ni zui ta zel a ni.

(Source: Hei hi Upa R. Lalnunmawia ziak beh chhan a ziah a ni - buata bawihtlung)